Mübarizin "vətənpərvərliyi": İnsanlar hüzn içində, Mənsimovlar ailəsində isə toydur...
Hər şeyi inzibati yolla qadağa etmək də düzgün deyil. Bu, sadəcə, ləyaqət və vicdan məsələdir. Məsələn, bir neçə gen əvvəl "Palmali" şirkətlər qrupunun prezidenti Mübariz Mənsimovun qardaşı oğlu Qurbanəli Mənsimovun toy mərasimi keçirilib. Ən həssas məqamda. İnsanlar hüzn içində, Mənsimovlar ailəsində isə toydur. Mübariz Mənsimov "vətənpərvərlik"dən dəm vurur, sosial şəbəkədə layk xatirinə pafoslu çıxışlar edir. Gəmilərə şəhidlərin adını verir, təqdir olunur, ümid edək ki, burada da reklam niyyəti yoxdur. Çünki baş verənlər əksini deyir. "Vətənpərvər" Mübariz niyə qardaşı oğluna tövsiyə etməyib ki, toy mərasimini bir qədər ertələsin?
Deməli, onların vətənpərvərliyi, torpağa bağlılığı sözdədir, əməl isə ortadadır. Heç utanmadınızmı övladı şəhid olan ata-anadan, atası şəhid olan övladlardan? Heç utanmadınızmı iki gün sonra nişanı olacaq şəhidin ailəsindən? Onların acısına şərik olmaq beləmi çətindir sizin üçün? Onlar düşünürlər ki, övladlarımız torpaqlarımız uğrunda canlarını fəda edəndə, kimlərsə toy-büsat qurur, əylənir... Ümumiyyətlə, dövlət belə məsələdə qadağa qoymur, insanların öz vicdanına buraxıb. Belə olan halda, kim nədirsə, iç üzü ortaya çıxır. Olmazdımı ki, toylar və başqa şənliklər bir müddət təxirə salınsın? Axı bu Vətən övladları hamımızın uğrunda döyüşüb şəhid olublar... Təbii ki, şəhid valideynləri böyük insanlardır, onlar yaxşını-pisi ayırd etməyi hamıdan yaxşı bilirlər. Amma düşünürəm ki, qəhrəmanlarımızın ata-analarına, övladlarına qarşı həssas olmalıyıq. Sözdə deyil, əməldə! Şənliklərindən qalmayanlar əmin olsunlar ki, hərəkətləri Ali Baş Komandan İlham Əliyevin rəhbərliyi ilə əldə edilən qələbələrə kölgə sala bilməz. Vətən müharibəsi və sonrakı əməliyyatlar qəhrəmanlıq salnaməmizdir, Azərbaycan tarix yazdı, elə tarix ki əsrlər boyu müzakirə olunacaq, təhlil ediləcək.
