Azərbaycana külli miqdarda qızıl gətirənlər yaxalandı
Moskva-Bakı aviareysi ilə Azərbaycan paytaxtına gələn Rusiya Federasiyasının vətəndaşı Mübariz Nağıyev gömrük nəzarətindən keçərkən Hava Nəqliyyatında Baş Gömrük İdarəsinin əməkdaşları tərəfindən onun əl çantası rentgen aparatı vasitəsilə yoxlanılıb və monitorda zərgərlik məmulatlarına bənzər əşyaların təsvirləri görünüb. Oxu.az Gömrük Komitəsinə istinadən xəbər verir ki, təkrar yoxlama zamanı həmin çantanın içərisindən M.Nağıyevin gömrük nəzarətinə təqdim etmədiyi, bəzilərinin üzərində qaşlar olan 7 cüt sırğa, 6 ədəd üzük, 9 ədəd boyunbağı, 2 ədəd qolbaq və 4 ədəd kulon aşkar olunub.
Ədliyyə Nazirliyi Məhkəmə Ekspertizası Mərkəzinin arayışına əsasən, ekspertizaya təqdim edilən həmin əşyalar ümumi çəkisi 167,60 qram olan və 585 əyarlı qızıldan hazırlanmış zərgərlik məmulatlarıdır. Bundan başqa, Dubay-Bakı aviareysilə gələn Azərbaycan Respublikasının vətəndaşı Kamilə Abdurəhimovaya məxsus əl çantası da rentgen aparatı vasitəsilə yoxlanılarkən monitorda zərgərlik məmulatlarına bənzər əşyaların təsvirləri qeydə alınıb. Təkrar yoxlama zamanı həmin çantanın içərisindən K. Abdurəhimovanın gömrük nəzarətinə təqdim etmədiyi, bəzilərinin üzərində qaşlar olan 12 ədəd boyunbağı, 4 ədəd qolbaq, 10 ədəd kulon və 2 ədəd üzük aşkar edilib.
Daha sonra K.Abdurəhimovanın üzərində keçirilən şəxsi yoxlama zamanı ondan gömrük nəzarətinə təqdim etmədiyi, bəzilərinin üzərində qaşlar olan 10 cüt və 1 ədəd sırğa, 1 ədəd sırğa və üzük dəsti, 1 ədəd sırğa və kulon dəsti aşkar olunub. Ədliyyə Nazirliyi Məhkəmə Ekspertizası Mərkəzinin arayışına əsasən, ekspertizaya təqdim edilən həmin əşyalar ümumi çəkisi 215,97 qram olan və 750 əyarlı qızıldan hazırlanmış zərgərlik məmulatlarıdır. Hər iki faktla bağlı təhqiqat aparılır.
