Ukraynada vəfat edən azərbaycanlı jurnalist keçən il əməliyyat olunubmuş
Jurnalistin dünyasını dəyişməsi onu tanıyanların təəccübünə səbəb olub. Çünki İ.Camalbəyli təxminən altı ay öncə - 2023-cü ilin sentyabrında açıq ürək əməliyyatı olunmuş, dörd damarı dəyişdirilmişdi.
Mərhumla dostluq edən “Birlik” Odessa azərbaycanlıları diaspor təşkilatının sədr müavini, Ukraynada yaşayan jurnalist Anar Natiqoğlu Modern.az-a bildirib ki, həkimlər İ.Camalbəyliyə məsləhət görmüşdülər ki, ürək əməliyyatından sonra sağlamlıq durumunu nəzarətdə saxlasın:
“Təəssüf ki, dostumuz özünə baxmır, səhhətinə diqqət etmirdi. Biz də buna görə dəfələrlə onu məzəmmət etmişdik, deyirdik ki, özünü qorusun, çünki ürək damarlarına əvvəlcə stent qoyulmuş, sonra da açıq əməliyyat edilmişdi. Ona sürətli hərəkət, futbol oynamaq, siqaret çəkmək olmazdı. Amma İdrak nə futbol oynamağından qalırdı, nə də siqareti tərgitmişdi. Axırı da belə… Elə dünən futbol oynayan zaman - stadionda ürək çatışmazlığından vəfat edib. Bu itki İdrakı tanıyanların hamısını çox sarsıtdı”.
Anar Natiqoğlu bildirib ki, hazırda mərhumun cənazəsinin Vətənə yola salınması üçün sənədləşdirmə işləri aparılır:
“Səfirlik və diaspor təşkilatları bu işlərlə məşğul olurlar. Yəqin ki, yaxın iki gün ərzində onun cənazəsi Bakıya göndəriləcək”.
Qeyd edək ki, İdrak Camalbəyli iki uşaq atası olub. Onun ailəsi Bakıda yaşayır.
1976-cı il təvəllüdlü İ.Camalbəyli 2003-cü ildən jurnalistika ilə məşğul olub. O, “Bakı xəbər” və “Ölkə” qəzetlərində, ANSPress.com və Missiya.az informasiya portallarında çalışıb.
Son illər yaşadığı Ukraynada müharibə başlayandan sonra Azərbaycan və xarici media orqanları üçün xəbərlər hazırlayıb, “Amerikanın səsi” radiosu ilə əməkdaşlıq edib.
