Böyük Britaniyanın Baş Qərargah rəisi Rusiyaya xəbərdarlıq edib
“Report” “Haber Global”a istinadən xəbər verir ki, bunu Böyük Britaniya Silahlı Qüvvələrinin Baş Qərargah rəisi general Toni Radak deyib.
O, Rusiyanın addımlarının Qərbin maraqları üçün təhdid olduğunu bildirib: “Rusiyanın Krımı ilhaq etməsindən təxminən 8 il sonra 10 minlərlə rus əsgərinin Ukrayna sərhədinə yerləşdirilməsinin yaratdığı böhran bizi çox narahat edir”.
T.Radak həmçinin Çin, İran və Şimali Koreyanın dünyaya meydan oxumaq səylərinin təhlükəsizlik üçün təhdid olduğunu söyləyib.
Xatırladaq ki, Ukraynanın Donbas bölgəsində hərbi əməliyyatlar 2014-cü ilin aprel ayında başlayıb. Nəticədə Donetsk və Luqansk regionları separatçıların nəzarətinə keçib. Döyüşlər Ukraynanın Silahlı Qüvvələri və qondarma Donetsk və Luqansk respublikalarının silahlıları arasında gedir. Ukrayna tərəfi dəfələrlə bəyan edib ki, separatçıların sırasında Rusiya hərbçiləri də var. Rəsmi Moskva bu ittihamı rədd edir.
