Rusiyalı milyarderlər bu il 32 milyard dollar itiriblər
“Report” xəbər verir ki, bu barədə “Bloomberg” nəşri yazıb.
Ekspertlər hesab edirlər ki, Qərblə Rusiya arasında münasibətlərin daha da pisləşməsi daha böyük itkilərə səbəb ola bilər.
Bildirilib ki, rusiyalı milyarderlər sırasında ən çox itki verən iş adamı Gennadi Timçenkodur. 2022-ci ildə 69 yaşlı biznesmenin sərvət üçdəbir azalıb. 1990-cı illərin əvvəllərində Rusiyanın gələcək prezidenti Vladimir Putinlə dost olan sovet zabitinin oğlu Timçenkonun bank hesablarında təxminən 16 milyard dollar var və sərvətinin əsas hissəsi Rusiyanın qaz hasilatı “Novatek” şirkətinin payından əldə olunub.
Bu şirkətin digər səhmdarı Leonid Mixelsonun sərvəti bu il 6,2 milyard dollar azalıb. “Lukoyl”un idarə heyətinin sədri Vahid Ələkbərov da xeyli itki verib. Analitiklər onun eyni dövrdə təxminən 3,5 milyard dollar itirdiyini deyirlər. Enerji şirkətinin səhmləri təxminən 17 % ucuzlaşdığı vurğulanıb.
Xatırladaq ki, 2022-ci ilin fevralın 21-də Rusiya Prezidenti Vladimir Putin xalqa müraciətində Ukraynanın Donbas ərazisində yaradılan iki qondarma respublikanı tanıdığını bildirib. O, bununla bağlı fərman imzalayıb.
Qərb ölkələri, o cümlədən Türkiyə və Gürcüstan Rusiyanın bu addımını pisləyib və bunun beynəlxalq hüquqa zidd olduğunu açıqlayıblar.
Azərbaycan daxil olmaqla, BMT üzvlərinin mütləq əksəriyyəti Krım yardımadası və Donbası Ukraynanın ərazisi olaraq tanıyır.
