Qırğızıstan tərəfdən ölənlərin sayı 46-ya çatdı
Yeniavaz.com xəbər verir ki, bu barədə bazar günü Qırğızıstanın Səhiyyə Nazirliyi məlumat yayıb.
"Batken vilayətindən alınan əməliyyat məlumatlarına əsasən, daha 10 nəfərin cəsədi Batkenin səhiyyə təşkilatlarına daxil olub. Batken vilayətində silahlı qarşıdurma nəticəsində ölənlərin ümumi sayı 46 nəfərdir", - məlumatda bildirilir.
Bundan başqa, nazirliyin son məlumatına görə, 140 nəfər xəsarət alıb, onlardan 7-si ambulator müalicəyə göndərilib. Səhiyyə Nazirliyi qeyd edir ki, dərmanlar və tibbi məhsullar kifayət miqdarda mövcuddur.
Qeyd edək ki, Qırğızıstan və Tacikistan sərhədində vəziyyət sentyabrın 14-də gərginləşib. Qırğızıstan tərəfinin bildirdiyinə görə, tacik sərhədçiləri Qırğızıstanın Batken vilayətinin Batken rayonunun Bulak-Başı bölgəsindəki sərhəd bölgəsinə daxil olaraq döyüş mövqelərini tutublar. Ərazini tərk etmək tələbinə cavab olaraq Tacikistanın sərhədçiləri atəş açıb, ardınca atışma baş verib. Bir neçə saat sonra Batken bölgəsindəki Kak-Sai və Paski-Arık bölgələrində də silahlı toqquşmalar baş verib. Sentyabrın 17-də Qırğızıstanın sərhəd xidməti Oş vilayətinin sərhəd hissəsinin atəşə tutulması barədə məlumat verib. Qırğızıstan hakimiyyəti 140 mindən çox vətəndaşı təxliyə edib. Batken bölgəsində fövqəladə vəziyyət rejimi tətbiq edilib.
