Azərbaycan Dövlət İqtisad Universiteti tərəfindən keçirilən tender müsabiqəsinin qalibi məlum olub.
Yeniavaz.com açıqlanan rəsmi məlumatlara istinadən bildirir ki, dəyəri 24 min 573 manat 50 qəpik olan tender müsabiqəsinin qalibi “Art Arena Construction” MMC (VÖEN - 1506590081) olub.
“Art Arena Construction” MMC Dövlət İqtisad Universitetinə fərdi mühafizə vasitələri – 80 ədəd əleyhqaz, 80 ədəd respirator, 10 ədəd sanitar çanta, 5 ədəd sanitar xərəyi, 25 ədəd ilk yardım dəsti və 5 ədəd yanğın söndürmək üçün geyim dəsti satacaq.
Nizamnamə kapitalı 10 manat olan “Art Arena Construction” MMC -nin hüquqi ünvanı Nərimanov rayonu, Qarabağ, ev 37, m. 4-də yerləşir. MMC-nin qanuni təmsilçisi Həsənov Seymur Yaşar oğludur.
Tender müsabiqəsinin maraqlı və qəribə tərəfi odur ki, qalib şirkət – “Art Arena Construction” MMC tender müsabiqəsinin başlamasından cəmi 22 gün əvvəl dövlət qeydiyyatına alınıb.
Tender müsabiqəsi 07 dekabr 2023-cü il tarixində başlayıb, tenderin qalibi olan “Art Arena Construction” MMC isə 14 noyabr 2023-cü il tarixində dövlət qeydiyyatına alınıb.
Daha əvvəl dəfələrlə qeyd etdiyimiz kimi, bu hal “Dövlət satınalmaları haqqında” Qanunun 6-cı maddəsində malgöndərənlərin (podratçıların) ixtisasına dair tələblərə uyğun deyil. Belə ki, həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığın, təcrübəsin, texniki və maliyyə imkanlarının, işçi qüvvəsinin, idarəetmə səriştəsinin, etibarlılığın olması lazımdır.
Cəmi 22 gün əvvəl yaranan şirkətin tender müsabiqəsində qalib olması başa düşülən deyil.
Qeyd edək ki, “Art Arena Construction” MMC barəsində açıq internet resurslarda heç bir məlumat yoxdur. 24,6 min manat dəyərində tender udan şirkətin nəinki rəsmi saytı, hətta sosial şəbəkə hesabı belə yoxdur.


501 dəfə oxundu