Kriptovalyuta bazarında YENİ DALĞA – “Bitcoin” daha da BAHALAŞACAQ?
Bu fikri Bizim.Media-ya açıqlayan kriptovalyuta bazarı üzrə mütəxəssis Elnur Quliyev yanvarın 11-də ABŞ-nin Qiymətli Kağızlar və Birjalar Komissiyası tərəfindən (SEC) ilk dəfə “Spot Bitcoin ETF”-nin təsdiq edildiyini diqqətə çatdırdı.
Onun sözlərinə görə, bu təsdiq “Bitcoin” tarixində əlamətdar hadisələrdən biri hesab edilir:
“Deməli, korporativ investorlar bundan sonra birbaşa “Bitcoin” almadan, dolayı yolla onun qiymətinin dəyişməsi ilə qazanmaq imkanı əldə edəcəklər. ETF üçün müraciət etmiş “Grayscale”, “BlackRock”, “Valkyrie”, “Bitwise”, “Hashdex”, “ARK 21Shares”, “Invesco Galaxy”, “Fidelity”, “Franklin Templeton”, “VanEck” və “Wisdom Tree” şirkətlərinin təklifləri bir anda təsdiqləndi. Yeni investisiya məhsullarının ticarətinə Nyu-York Fond Birjasında (NYSE), Nasdaq və “Chicago Board Options Exchange”də (CBOE) icazə verilir”.
Bəs nəyə görə “Spot bitcoin ETF” diqqət mərkəzindədir?
Müsahibimiz bunun səbəbini dünyanın əksər böyük ölkələrində kriptovalyutalara hələ də hüquqi statusun verilməməsi ilə əlaqələndirdi:
“Yəni kriptovalyutalar qanuni investisiya aləti deyil. Büdcəsinin müəyyən hissəsini rəqəmsal aktivlərə yatırıb pul qazanmaq istəyən şirkətlər və pərakəndə investorlar bunu sadəcə olaraq qeyri-qanuni olduğu üçün edə bilmirlər. “Spot bitcoin ETF” “Bitcoin”in qiymətini izləyən və onu spot bazarda satın alan birja ticarəti fondudur. Bu fond investora birbaşa Bitkoin almadan belə, yəni dolayı yolla onun qiymətinin dəyişməsində qazanmaq imkanı verir.
İnvestorlar kriptovalyuta birjaları və elektron pul cüzdanları ilə məşğul olmaq əvəzinə adi broker hesabları vasitəsilə Nasdaq, NYSE kimi beynəlxalaq birjalarda “Bitcoin ETF” səhmlərini ala bilər. Bu da rəqəmsal valyutaya sahib olmaq və saxlamaqla bağlı risklər və mürəkkəbliklərdən narahat olmadan “Bitkoin”ə investisiya qoymağa üstünlük verən ənənəvi investorlar üçün daha əlverişli və əlçatan maliyyə alətidir”.
Onun sözlərinə görə, indiki halda “Spot Bitcoin ETF”nin təsdiqi kriptovalyuta sektoruna müsbət təsir göstərəcək:
“Böyük gözləntilər var ki, kriptovalyuta bazarına iri investisiya fondları tərəfindən kapital axını olacaq ki, bu da kriptovalyutaların dəyərinin qalxmasına birbaşa təsir edəcək. Ola bilsin ki, qısamüddətli mövqedə qiymətlərdə müəyyən korreksiya müşahidə etdik, amma üzünmüddətli mövqedə rəqəmsal aktivlərin qiymətlərinin yüksəlməsini müşahidə edəcəyik”.
Müsahibimiz, sonda “Ethereum “kriptovalyutasının da 8% dəyər qazandığını diqqətə çatdırıblar:
“Bununla da 2600 dollara qədər yüksəlməyi bacardı. Hesab edirəm ki, yaxın gələcəkdə “spot ethereum ETF”-nin təsdiqini müşahidə edəcəyik. Bu, kriptovalyutanın sürətlə dəyər qazanmasına şərait yaradacaq”.
