Qazi anasının deputata dedikləri gündəm oldu: "Süpürgəçi işləyib böyütmüşəm..." - Video
Yeniavaz.com xəbər verir ki, deputatla görüş zamanı şəhid ailələri, qazilər və bəzi qazilərin ailə üzvləri iştirak edib.
Vətən müharibəsi qazisi Davud Bağırzadənin anası öz çıxışında hələ də övladınının haqqının verilmədiyini bildirib.
Övladını çətin şəraitdə, məhdud imkanlarla böyütdüyünü bildirən qazi anası oğlunun müalicəsi və sağlamlığının bərpası üçün köməklik edilməsini istəyib:
“Müharibə başlayanda oğlum könüllü ərizə yazıb cəbhəyə getdi. Dedi, anaların göz yaşına dözmək mümkün deyil. Döyüşlərdə şücaətinə görə 3 medal alıb, Füzuli və Hadrut istiqamətində vuruşub. Oğlumun əl-ayağı yerindədi, amma daxili orqanları para-paradır. Mənim uşağımın 1,90 boyu var, o mənim gözümün qabağında çabalayanda mən ana özümü öldürmək istəyirəm. Oğlumun əlilliklə bağlı müraciətinə imtina gəlib. Ağciyərinin pərdəsində 7 dənə qəlpəsi var. Qar yağanda mənim uşağım pəncərəni açıb yatırdı, o cür sağlam uşaq idi. Bağırsaqlarının yarısı yoxdu. Bu uşaq gedib öz canını verib. Siz buna niyə belə qiymət qoymursunuz? Mənim oğlum kimi minlərlə cavan getdi namusla-qeyrətlə vuruşdular. Mən vətənin azadlığı üçün övladımı vermişəm. Mən süpürgəçi işləyə-işləyə o uşağı böyütmüşəm, indi də müalicə edirəm. Mən anayam axı, özümə qəsd eləmək istəmişəm. Niyə bir nəfər gəlib mənim qapımı açmır? Demir ki, sən bu evin içində nə çəkirsən? Dövlətin məmurları niyə mənim uşaqlarıma yiyə durmurlar. Öz sağlam övladımı bu vəziyyətdə görmək ürəyimi yandırır. Vətən borcunu yerinə yetirmək hamımızın borcudur. Mən nə ev istəyirəm, nə pul istəyirəm. Təkcə mənim övladımın haqqını versinlər”.
