“Hollywood Cinema Club”la bağlı qərar verildi - Milyonluq mülk niyə 300 manata icarəyə verilib?
Qaynarinfo-nun məlumatına görə, Səbail Rayon Polis İdarəsinin 41-ci polis bölməsinin əməkdaşları 30 oktyabr 2021-ci il tarixdə, saat 01.00 radələrində "Hollywood Cinema Club”da kinoteatr, karaoke və oyun-əyləncə xidmətlərinin göstərilməsi, müştərilərə qəlyan avadanlıqlarının verilməsi aşkar edilib və həyata keçirilən profilaktik tədbirlər nəticəsində klubun qanunsuz fəaliyyətinin qarşısı alınıb.
30 oktyabr 2021-ci il tarixdə koronavirus pandemiyası ilə əlaqədar tətbiq edilən xüsusi karantin rejimi qaydalarına riayət edilməsinə nəzarət məqsədi ilə həyata keçirilən tədbirlər zamanı "Hollywood Cinema Club”da xüsusi karantin rejiminin pozularaq müştərilərin sıx şəkildə qanunla müəyyən edilmiş ara məsaflərini gözləmədən əyləşməklə xəstəliyin yayılması üçün real təhlükə yaranmasının aşkar edilməsi faktı və həmin fakt üzrə toplanmış material üzrə Bakı şəhəri Səbail Rayon Polis İdarəsinin İstintaq şöbəsində Azərbaycan Respublikası Cinayət Məcəlləsinin 139-1.1-ci maddəsi ilə nömrəli cinayət işi başlanıb.
18 noyabr 2021-ci il tarixdə Bakı Şəhər Prokurorluğu tərəfindən cinayət işi ibtidai istintaqın davam etdirilməsi üçün Bakı Şəhər Baş Polis İdarəsinin İstintaq və Təhqiqat İdarəsinə göndərilib.
16 yanvar 2022-ci il tarixdə cinayət işi üzrə icraat Azərbaycan Respublikası Cinayət Prosessual Məcəlləsinin 53.1.1-ci maddəsinin tələblərinə əsasən dayandırıləb və 28 yanvar 2022-ci il tarixdə cinayət işi üzrə icraat təzələnib.
16 fevral 2022-ci il tarixli qərarla təqsirləndirilən şəxs Azərbaycan Respublikası Cinayət Məcəlləsinin 139-1.1-ci maddəsi ilə istintaqa cəlb edilməklə həmin maddədə nəzərdə tutulmuş ittiham ona elan edilib və həmin tarixdə barəsində polisin nəzarəti altına vermə qətimkan tədbiri seçilib.
24.08.2022-ci il tarixində keçirilən məhkəmədə "Hollywood Cinema Club”un sahibi, biznesmen və BDU-nun Hüquq fakültəsinin müəllimi Ərəstun Qasımov da dindirilib. O bildirib ki, fərdi sahibkarlıqla məşğuldur və "Pure Boutique” otelini icarə əsasında işlədir. "Hollywood Cinema Club” onun həyat yoldaşı Sevinc Qasımovanın adınadır. Həmin qeyri-yaşayış sahəsi ailə olaraq onların ümumi əmlaklarıdır. Təqsirləndirilən şəxs isə onun dostudur. Onunla təxminən 2 il əvvəl məclislərin birində tanış olub və aralarında dostluq münasibətləri yaranıb.
"Hollywood Cinema Club”u təxminən 2018-ci ildə özü inşa etdirib və işlədib. 2021-ci il tarixdə isə işləri çox olduğundan icarəyə vermək qərarına gəlib. Həmin ilin sentyabr ayında dostu ondan xahiş edib ki, "Hollywood Cinema Club”u icarə əsasında işlətmək üçün versin. O da obyekti içərisindəki bütün avadanlıqlarla birlikdə təqsirləndirilən şəxsə icarəyə verib.
29 sentyabr 2021-ci il tarixdə obyekt Sevinc Qasımova və Anar Osmanov arasında notarial qaydada təsdiq edilmiş müqavilə ilə sonuncuya aylıq 300 manata icarəyə verilib. Təqsirləndirilən şəxs özü şəxsən klubun fəaliyyətini idarə edib və işçilərə rəhbərliyi həyata keçirib. Ərəstun Qasımov və həyat yoldaşı mülkiyyətçi olaraq həmin klubun fəaliyyətinə ümumiyyətlə qarışmayıb. 30 oktyabr 2021-ci il tarixdə "Hollywood Cinema Club”da xüsusi karatin rejiminin pozulmasından özünün və xanımının xəbəri olmayıb.
Hakim Ülviyyə Şükürovanın sədrliyi ilə keçirilən məhkəmədə təqsirləndirilən şəxsin Cinayət Məcəlləsinin 139-1.1-ci maddəsi ilə irəli sürülmüş ittiham üzrə əməldə cinayət tərkibinin olmamasına qərar verilib və o, bəraət alıb. Təqsirləndirilən şəxs barəsində seçilmiş "polisin nəzarəti altına vermə” qətimkan tədbiri də ləğv edilib.
Qeyd edək ki, 2020-ci ildə səs-küy səbəbindən "Hollywood Cinema Club”un üzərindəki yaşayış binasının sakinləri polisə şikayət etmişdi.
Xatırladaq ki, sahibkar Ərəstun Qasımovun oğlu Əlyar Qasımov Bakının Səbail rayonu ərazisində, "Sahil bağı” (keçmiş "26 Bakı Komissarı” bağı) yaxınlığında, Xaqani küçəsində yerləşən "26” - "Twenty six” adlı kafenin açılması ilə qalmaqal yaratmışdı. Əlyar Qasımov 2019-cu ildə "Papa Cinema” adlı klubda Tural adlı şəxs tərəfindən "sən mənim sevgilimə "padxod” eləmisən” sözündən sonra bıçaqlanıb.
