Rəsul Quliyevin Partiyasından Prezidentə tma dəstək
GUNDEMİNFO.AZ xəbər verir ki, bəyanatda deyilir:
Xalqımız tariximizin ən şərəfli günlərindən birini - Zəfər gününün növbəti ildönümünü böyük qürurla qeyd edir.
Müzəffər Azərbaycan Ordusu 2020-ci il sentyabr ayının 27-dən etibarən Ermənistan tərəfindən işğal edilmiş ərazilərimizin azad olunması üçün zəfər yürüşünə başladı.
Prezident İlham Əliyevin qətiyyətli siyasəti, Milli Ordumuzun rəşadəti və iqtidarlı-müxalifətli xalqımızın dəmir yumruq kimi birləşməsi nəticəsində 44 günlük Vətən müharibəsində işğal altında olan torpaqlarımız işğaldan azad edildi.
Noyabrın 8-də cəsur Xüsusi təyinatlarımızın, qəhrəman ordu birləşmələrimizin rəşadətli mübarizəsi, dünya hərb tarixinə qızıl hərflərlə yazılacaq unikal hərbi əməliyyatları nəticəsində Şuşa şəhəri işğaldan azad olundu. Şuşa şəhərinin azad olunmasından sonra Ermənistan məğlubiyyətini etiraf etmək məcburiyyətində qaldı.
Bu əlamətdar qələbəyə öz həyatları bahasına töhvə vermiş şəhidlərimizin ruhunu minnətdarlıqla anır, qazilərimizə can sağlığı, bütün hərbçilərimizə güc-qüvvət arzulayırıq.
44 günlük Vətən müharibəsində qazandığımız qələbədə Ali Baş Komandan, ölkə Prezidenti İlham Əliyevin liderlik, sərkərdəlik bacarığı və qabiliyyəti xüsusi qeyd olunmalıdır.
Eyni zamanda xalqımızın hər bir sadə, vətənpərvər övladının ordumuza dəstəyi, köməyi, siyasi partiyaların dürüst və sağlam, dövlətçi mövqeyi də xüsusi qiymətləndirilməlidir. Biz öz həmrəyliyimizlə, milli birliyimizlə həm də bir xalq olaraq düşmənə qalib gəldik.
Müharibədən sonra biz həm yaralarımızı sağaltmaqla, həm işğaldan azad olunmuş ərazilərimizdə geniş tikinti-quruculuq işləri aparmaqla, həm ordumuzu, müdafiə qabiliyyətimizi gücləndirməklə, həm də eyni zamanda diplomatik üsullarla sülhü təmin etməklə məşğul olmağa başladıq.
Hazırda Ermənistanla yekun sülh müqaviləsi imzalamaq, delimitasiya, demarkasiya proseslərini həyata keçirmək üçün danışıqlar gedir. Belə bir zamanda bir sıra ölkələrin ədalətsiz mövqeyi ilə üzləşirik. Azərbaycanın ərazi bütövlüyünü bərpa etməsi və yekun sülh müqaviləsini imzalamaq istiqamətində qətiyyətli diplomatiya həyata keçirməsi eyni zamanda qardaş Türkiyə ilə hərtərəfli əlaqələr qurması və bu əlaqələri genişləndirməsi görünür bir çox dövlətləri, xüsusilə də Fransa kimi, İran kimi, Rusiya kimi bir sıra ölkələri narahat edir. Ermənilər ənənəvi olaraq götürdükləri öhdəlikləri öz himayədarlarına güvənərək yerinə yetirməkdən yayınmağa çalışırlar. Amma unudurlar ki, Azərbaycan xalqının dəmir iradəsi, ordumuzun gücü qarşısında heç bir beynəlxalq təziq duruş gətirmək iqtidarında deyildir. Biz Azərbaycan olaraq beynəlxalq hüququn və götürülmüş öhdəliklərin beynəlxalq hüquq normaları daxilində həllini tələb edən tərəfik!
Zaman bizim lehimizə, düşmənlərimizin və bədxahlarımızın isə əleyhinə işləyir. Azərbaycanla qardaş Türkiyə arasında imzalanmış Şuşa Bəyannaməsi proseslərin daha uğurla gedəcəyinin təminatçısıdır.
Görüləcək çok işlərimiz var. Naxçıvanla ana Vətəni birləşdirən Zəngəzur dəhlizini açmalı, hələ də düşmən tapdağında qalan Vətən torpaqlarını azad etməli, tarixi ədalətsizlikləri aradan qaldırmalıyıq.
Heç şübhəsiz ki, lazım gəlsə yenə düşmənə gücümüzü göstərməli olacağıq. Belə bir siyasi və hərbi zərurət yaranacağı halda Gələcək Azərbaycan Partiyası indidən bəyan edirik: BİZ ORDUMUZUN ALİ BAŞ KOMANDANI, PREZİDENT İLHAM ƏLİYEVİN YANINDAYIQ! Heç bir siyasi hədəf, heç bir siyasi niyyət və məqsəd bizim vətənimizin bütövlüyündən və milli dövlət maraqlarımızdan üstün deyildir! Bəyan edirik ki, belə bir tarixi şəraitdə əks mövqe nümayiş etdirən hər hansısa bir siyasi qüvvə olarsa heç şübhəsiz ki, o bizdən deyildir!
Gələcək Azərbaycan Partiyası olaraq, yuxarıda göstərilənləri nəzərə alaraq Zəfər Günü münasibətilə xalqımızı ürəkdən təbrik edir, qələbələrin davamlı olmasını arzu edirik!
Zəfər Bayramınız mübarək!
