Qardaşının məktəbli sevgilisini döydüyü deyilən bacı danışdı
Belə ki, oğlan və qız sevgili olublar. Oğlanın bacıları qıza onun başqa sevgilisinin olduğunu deyib və qardaşlarından uzaq durmağı tələb ediblər.
İddialara görə, bundan sonra oğlanın bacıları ilə 10-cu sinif şagirdi olan qız arasında mübahisə baş verib və bacılar qızı döyüblər.
Məsələ ilə bağlı sözügedən bacılardan biri Samirə Nəsirova ilə əlaqə saxladıq.
Yenisabah.az-a danışan S.Nəsirova bu iddiaların tamamilə əsassız olduğunu bildirib:
“Biz 10-cu sinif şagirdi olan qızı döyməmişik, ümumiyyətlə, məsələ bu cür olmayıb. Həmin qıza mesaj yazmışıq, qardaşımdan uzaqlaşmasını istəmişik, o isə bizi “söhbətə çağırıb”. Bizə mesaj yazaraq həd-qorxu gəldi və bildirdi ki, sabah dediyim yerə gələrsiniz, məsələni həll edərik.
Biz həmin yerə getmədik, 16 yaşlı uşaq valideyn himayəsindədir, məhz bu səbəbdən bacım və mən birbaşa onun oxuduğu 97 saylı məktəbə yollandıq. Məktəbdə onun valideynlərinin gəlməsini tələb etdik. Məktəbin psixoloqu, direktoru bildirdi ki, həmin şagirdin psixoloji durumu yerində deyil və dəfələrlə psixoloq qəbulunda olub. Biz məktəbdə olduğumuz vaxt 16 yaşlı şagird hər kəsin gözü önündə mənim bacıma şillə vurdu. Bundan sonra iş polisə qədər uzandı, biz bölmədə polisə 16 yaşlı məktəblinin bizə yazdığı hədə-qorxu dolu mesajları göstərdik. Şagird bizə demişdi ki, mən heç kəsdən qorxmuram, atam və qardaşım Prezident Aparatında işləyir. Polis onun qardaşını bölməyə çağıranda isə məlum oldu ki, qardaşı taksi sürücüsü, atası isə bir müəssisədə qapıçı olaraq çalışır. Qızın qardaşı bizdən üzrxahlıq etdi. Daha sonra biz izahatımızı yazıb bölmədən çıxdıq, onlar isə orada qaldı. Əgər biz 10-cu sinifdə oxuyan məktəblini döysəydik, polis bizi buraxardımı? Bu xəbərlər tamamilə yalandır. Nə belə bir görüş olub, nə də biz məktəblini döymüşük”.
S.Nəsirova sonda qeyd edib ki, hadisə 97 saylı məktəbdə müzakirə olunanda, bu məsələnin onlara aidiyyatı olmadığı deyilib. Bildirdilər ki, hadisə məktəbdən kənarda baş verdiyi üçün bizə aidiyyatı yoxdur.
