DSMF "Xəzər Dəniz Gəmiçiliyi" və "Azəriqaz"ı məhkəməyə verib
2017-ci ilin I yarısı ərzində 742 sığortaedən üzrə 22,89 mln. manat və ya ilin əvvəlinə Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fonduna (DSMF) olan borcun 7,1%-i qədər borcun ödənişinin təmin edilməsi üçün məhkəmə orqanlarına iddia ərizələri göndərilib.
Hesablama Palatasından "APA-Economics"ə verilən məlumata görə, 2016-cı ilin eyni dövründə həmin göstəricilər, müvafiq olaraq, 2333 sığortaedən, 12,21 mln. manat və 3,8% təşkil edib.
Göründüyü kimi, keçən ilin eyni dövrü ilə müqayisədə 3,1 dəfə az sayda sığortaedənə qarşı məhkəmə iddiası qaldırılsa da iddia qaldırılmış borc məbləği əvvəlki illə müqayisədə 10,68 mln. manat və ya 87,5% çoxdur. Cari ilin 6 ayı ərzində əsasən böyük məbləğdə borcu olan sığortaedənlərə qarşı iddia qaldırılıb.
İddiaların 4-ü iri sığortaeənlərə qarşı (o cümlədən, 1 iddia "Azərbaycan Xəzər Dəniz Gəmiçiliyi" QSC-yə qarşı, 3 iddia "Azəriqaz" İstehsalat Birliyinə qarşı), 16-sı dövlət mülkiyyətində olan digər təşkilatlara qarşı, 1-i bələdiyyə mülkiyyətində olan təşkilata qarşı, 228-i digər hüquqi şəxslərə qarşı, 513-ü isə fiziki şəxslərə qarşı qaldırılıb.
Qaldırılmış iddia ərizələrindən 10,87 mln. manat məbləği əhatə edən 450 ərizəyə məhkəmə orqanlarında baxılıb, əvvəlki dövrlərdə qaldırılmış iddialar da daxil olmaqla 3,3 mln. manat məbləğində və ya qaldırılmış iddia məbləğinin 14,4%-i qədər iddia məbləği təmin edilib, 7,51 mln. manat məbləğində 7 iddia ərizəsi rədd edilib, təmin edilmiş iddia ərizələri üzrə 0,11 mln. manat (23,4%) vəsaitin ödənişi həyata keçirilib. Qeyd edilənlər debitor borcların aradan qaldırılması üzrə həyata keçirilmiş tədbirlərin yetərli olmaması barədə fikir söyləməyə əsas verir.
