Prokuror erməni terrorçu qrupun üzvlərinə cəza istəyib
“Report”un xəbərinə görə, hakim Faiq Qəniyevin sədrliyi ilə keçirilən prosesdə sənədlər tədqiq edilib.
Daha sonra məhkəmə istintaqının başa çatdığı elan olunub və söz dövlət ittihamçısına verilib.
Prokuror çıxışında təqsirləndirilən şəxslər barəsindəki Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə), 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) maddələrinin ittihamdan xaric edilməsini istəyib.
Dövlət ittihamçısı həmin şəxslərin 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycan Respublikasının dövlət sərhədini qanunsuz olaraq keçmə) və 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə) maddələri ilə cəzalandırılmalarını tələb edib.
Bildirib ki, həmin maddələrlə təqsirləndirilən şəxslər 7 il müddətinə azadlıqdan məhrum edilsin.
İttihamçı çıxışında həmin şəxslərin cəzaları başa çatandan sonra Azərbaycan Respublikası hüdudlarından çıxarılmasını tələb edib.
Məhkəmədə təqsirləndirilən şəxslərin vəkilləri müdafiə çıxışı edir.
Proses davam edir.
