Macarıstanda pulsuz təhsillə bağlı təqdimat keçiriləcək
2017-ci il üçün Macarıstanda təqaüd proqramı açıq elan edilmişdir. Bu təqaüd proqramı 200 nəfər azərbaycanlı tələbəyə Macarıstanın nüfuzlu universitetlərində pulsuz təhsil almaq imkanı verir.
Bununla bağlı Macarıstanda pulsuz təhsil almaq istəyən tələbələr üçün 14 yanvar 2017-cı il tarixində təqdimat keçiriləcək. Məlum olduğu kimi Macarıstan hökuməti 200 azərbaycanlı tələbənin həmin ölkənin dövlət universitetlərində pulsuz təhsili üçün təqaüd ayırıb.
Bu təqaüd proqramı çərçivəsində azərbaycanlı tələbələrin təhsil haqqı, yataqxanada yaşaması və illik tibbi sığorta haqqı tamamilə ödəniləcək və bundan əlavə olaraq bakalavr və magistr tələbələrinə 130 avro, PhD-də oxuyanlara isə 450-580 avro miqdarında aylıq təqaüd veriləcək.
Təqdimatda təqaüd proqramları barədə məlumat vermək, tələbə və valideynlərin suallarına cavab vermək üçün Debrecen Universitetinin əməkdaşları “Study Hungary” layihəsi tərəfindən Bakıya dəvət edilmişdir. Qeyd etmək yerinə düşər ki, Macarıstanın Debrecen universiteti azərbaycanlı tələbələrin ən çox seçdiyi və pulsuz təhsil aldıqları universitetlərdən birincisidir.
Tədbir zamanı tələbələr birbaşa olaraq Debrecen universitetlərinin nümayəndələrinə (ingilis və rus dilində) suallar verə biləcəklər. Universitetin nümayəndləri isə bu suallara ətraflı cavablar verərək kompüter mühəndisliyi, biznesin idarə edilməsi, tikinti və inşaat mühəndisliyi, səhiyyə elmləri, fizika və kimya mühəndisliyi, maşınqayırma, mexanika, elektrik mühəndisliyi və digər yüksək tələbatlı ixtisaslarda təqaüdlü təhsil almaq imkanları barədə tələbələrə məlumat veriləcək. Qeyd edək ki, bu universitet bakalavr, magistr və PhD pillələri üzrə dünya səviyyəli təhsil verir və onun diplomu Azərbaycan hökuməti tərəfindən tanınır.
Bu tədbir Macarıstan universitetlərinin Azərbaycandakı rəsmi nümayəndəliyi olan Study in Hungary-nin təşkilatçılığı ilə Dəmirçi Plazanın (ünvan: Bakı şəhəri, Xocalı prospekti 37, Xətai metrosunun arxası) konfrans zalında keçiriləcək.
Təqaüd proqramına marağın çox olduğunu nəzərə alaraq təqdimat 14 yanvar tarixində səhər saat 09:00-da və təkrarən 14:00-da keçiriləcək. Təqdimata giriş sərbəstdir və ödənişsizdir. Maraqlananlar əvvəlcədən qeydiyyatdan keçməklə bu təqdimatda iştirak edə bilərlər. Qeydiyyatdan keçmək üçün aşağıdakı məlumatları [email protected] e-mail ünvanına göndərmək lazımdır:
1) Tələbənin adı, soyadı və atasının adı
2) Tələbənin mobil telefon nömrəsi
3) Tələbənin xarici pasportunun foto və imza olan səhifələrinin skanerdən keçirilmiş surəti (və ya fotosu);
4) Əgər varsa, tələbənin IELTS (TOEFL və SAT) balının skanerdən keçirilmiş surəti (və ya fotosu);
Tələbə e-mailin mətnində saat neçədə təqdimata gəlmək istədiyini mütləq qeyd etməlidir. Tələbə göstərilən vaxtlardan yalnız birini seçə bilər: saat 09:00 və ya 14:00.
Qeydiyyatdan keçmək üçün e-mail yazarkən mail-in başlıq (ingiliscə “subject”, rusca “тема”) yerinə “14 yanvar təqdimatına qeydiyyat” yazılması vacibdir. Tədbirə qeydiyyat üçün son tarix 13 yanvar saat 12:00-dır.
Eyni zamanda tələbələr 050 257 11 41 telefon nömrəsinə öz ad, soyad, ata adını və e-maillərini göndərməklə qeydiyyatdan keçə bilərlər.
Xatırladaq ki, Macarıstan bir çox üstünlüklərə malik ölkədir. Belə ki, Avropa məkanında ən münasib təhsil və yaşayış xərcləri, daha az sənəd tələb edən və sadələşdirilmiş qəbul şərtləri, Nobel mükafatı qazanmış alimlər və ixtiraçılar yetişdirən ingilis dilli təhsil sistemi Macarıstanı digər ölkələrdən əsaslı şəkildə fərqləndirir.
