İstanbul 2036-cı il olimpiadasına namizəd olur
Türkiyənin İstanbul şəhəri 2036-cı il Yay Olimpiya Oyunlarına namizəd olacaq.
Gundeminfo.az-ın məlumatına görə, bu barədə şəhər meri Əkrəm İmamoğlu açıqlama verib. O, olimpiadanın keçirilməsi üzrə planını təqdim edərək, bütün müvafiq qurumlarla hökuməti bu istiqamətdə əməkdaşlığa və fəaliyyət göstərməyə çağırıb: "Biz ən böyük hədəfə - İstanbula dünyanın idman xəritəsində layiqli yer verməyə köklənmişik. Arzumuz İstanbulu milyonlarla insanın idmanla məşğul olduğu şəhərə çevirməkdir".
Qeyd edək ki, qarşıdakı Yay Olimpiya Oyunları 23 iyul - 8 avqustda Yaponiyanın paytaxtı Tokioda keçiriləcək. 2024-cü il olimpiadası Fransanın paytaxtı Parisdə, 2028-ci il Oyunları isə ABŞ-ın Los-Anceles şəhərində təşkil olunacaq. İyunda Beynəlxalq Olimpiya Komitəsi 2032-ci il Yay Olimpiya Oyunlarını Avstraliyanın Brisben şəhərində keçirməyi qərara alıb. Türkiyə isə indiyədək heç bir olimpiadaya ev sahibliyi etməyib.
