"Peyvəndlər koronavirusdan yüz faiz qorumur" - Səhiyyə Nazirliyi
Unikal.org xəbər verir ki, bu sözləri Səhiyyə Nazirliyinin baş infeksionisti Təyyar Eyvazov REAL TV-yə müsahibəsində deyib. O bildirib ki, klassik ştammla müqayisədə peyvəndlərin təsir gücü bir qədər aşağıdır: “Bu gün mövcud olan bütün peyvəndlər istənilən ştammdan qoruya bilir. Sadəcə fərqlər onların qoruyuculuq faizlərindədir. Ölkədə epidemioloji zənciri qırmaq üçün əhalinin təxminən 70-80 faizində immunitet olmalıdır. Bu zaman biz yenidən yoluxma hallarının sayının azalmasının şahidi ola bilərik.
Nəzərə alsaq ki, soyuq aylarda respirator virus infeksiyalarına yoluxma hallarında artım qeydə alınır. Buna da infeksiyanın fəsilliyi deyilir. COVID-19 infeksiyasının fəsilliyi haqqında danışmaq hələ tezdir. Çünki pandemiyanın başlanmasından cəmi bir il yarım keçib. Bunu zaman göstərəcək ki, həmin infeksiya həqiqətən fəsillik xarakterlidir, yoxsa yox.
Soyuq aylarda insanların həyat tərzində dəyişiklik odur ki, insanlar daha çox qapalı yerlərdə olurlar və burada təmaslar sıx olur. Nəticədə yoluxma şansı daha çox artır. Buna görə də payız aylarında yoluxma hallarının artımını proqnozlaşdıra bilərik. Nəzərə almaq lazımdır ki, burada əngəlləyici faktor vaksinasiya prosesidir.
Bugünkü gün trend o deyil ki xəstələnənlərin sayı artır, trend odur ki, nə qədər insan xəstəxanalara yerləşdirilir, nə qədər insan xəstəliyi ağır formada keçirir və vəfat edir. Vaksinasıyanın əhatə dairəsi artdıqca bu göstəricilərdə də dəyişiklik olacaq”.
