“Əli Nağıyevin təyinatından sonra DTX dövlət maraqlarına xidmət edən quruma çevrilib” - Fazil Mustafa
“Əli Nağıyev rəis təyin olunandan sonra Dövlət Təhlükəsizliyi Xidməti dövlət maraqlarına xidmət edən quruma çevrildi. Vətən müharibəsində də biz bunu gördük”.
APA-nın məlumatına görə, bunu bu Milli Məclisin iclasında “Kəşfiyyat və əks-kəşfiyyat fəaliyyəti haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsinin (birinci oxunuş) müzakirəsi zamanı deputat Fazil Mustafa bildirib.
F. Mustafa deyib ki, əvvəllər bu qurum sahibkarları incidən və digər mənfi əməllərlə yadda qalıb: “Bu baxımdan hazırda bu qurumun fəaliyyəti təqdir olunmalıdır”.
Deputat qeyd edib ki, kəşfiyyat və əks-kəşfiyyat fəaliyyəti ilə bağlı çalışan insanların maaşlarını artırmaq, mənzil-məişət məsələlərinin həlli üçün büdcədən daha çox vəsait ayırmaq lazımdırsa, büdcədən ayrılsın: “Bu 5 faiz məsələləri ilə onları gündəmə gətirməyək”.
Milli Məclis sədrinin birinci müavini Əli Hüseynli isə deyib ki, 5 faiz məhz büdcədən ayrılır, həmin qurumların əməkdaşların sosial müdafiəsini gücləndirmək və maddi-texniki bazasını möhkəmləndirmək məqsədilə o qurumların xəzinə hesabına köçürülür”.
Qeyd edək ki, “Kəşfiyyat və əks-kəşfiyyat fəaliyyəti haqqında” qanunda dəyişiklik edilməsi barədə qanun layihəsinə yeni maddə əlavə olunması təklif olunur.
Həmin maddəyə görə, əks-kəşfiyyat fəaliyyətinin subyekti olan müvafiq icra hakimiyyəti orqanı tərəfindən istintaqı aparılan cinayət işləri üzrə dövlətə vurulmuş ziyanın ödənilməsi üçün ibtidai araşdırma dövründə dövlət büdcəsinə ödənilməsi təmin edilmiş vəsaitin 5 faizi və Cinayət Məcəlləsi ilə müəyyən edilmiş qaydada şəxsin cinayət məsuliyyətindən azad edilməsi üçün dövlət büdcəsinə edilmiş ödənişdən daxil olan vəsaitin 5 faizi müvafiq icra hakimiyyəti orqanının əməkdaşların sosial müdafiəsini gücləndirmək və maddi-texniki bazasını möhkəmləndirmək məqsədilə müvafiq icra hakimiyyəti orqanının xəzinə hesabına köçürülür. Bu vəsaitdən istifadə qaydası müvafiq icra hakimiyyəti orqanı tərəfindən müəyyən olunur.
