"Qərb sərhədlərimizdə 12 hərbi hissə yaradacağıq" - Sergey Şoyqu
“Report” “RİA Novosti”yə istinadən xəbər verir ki, bu barədə Rusiyanın müdafiə naziri ordu generalı Sergey Şoyqu mayın 20-də Müdafiə Nazirliyində keçirdiyi kollegiyada bildirib.
Onun sözlərinə görə, Rusiyanın qərb sərhədlərində hərbi təhdid təhlükəsi artıb: “ABŞ-ın Avropada strateji uçuşlarının sayı 15 dəfə artıb. Amerika gəmilərinin Baltik dənizinə daxil olması sistematik xarakter alıb. Qarşılıq üçün uyğun tədbirlər görəcəyik. Bu şəraitdə döyüşən qoşunların tərkibini fəal şəkildə təkmilləşdiririk. İlin sonuna qədər Qərb Hərbi Dairəsində 12 hərbi hissə və bölmə formalaşdırılacaq”.
S.Şoyqu deyib ki, təşkilati tədbirlər qoşunların müasir silah və hərbi texnika ilə təchizatı sinxronlaşdırılır: “Bu il 2000-dən çox belə nümunənin qəbulu planlaşdırılır”.
Nazir vurğulayıb ki, qış hazırlıq dövrünün yekunları üzrə keçirilən nəzarət yoxlamaları bölmələrin hazırlıq səviyyəsinin əvvəlki illə müqayisədə keyfiyyətcə 25 faiz yüksəldiyini göstərib.
S.Şoyqu qeyd edib ki, Baltik Donanmasının gəmiləri tərəfindən yerinə yetirilən döyüş hazırlığı tapşırıqlarının intensivliyi 42 faiz artıb: “Müxtəlif növ silahlardan istifadə etməklə 300-dən çox döyüş təlimi keçirilib”.
