“Ət və kərə yağının baha olmasının əsas səbəblərindən biri 18%-lik ƏDV-dir”
Yeniavaz.com xəbər verir ki, bunu iqtisadçı ekspert Natiq Cəfərli sosial şəbəkə hesabındakı paylaşımında yazıb.
O bildirib ki, ƏDV ilə bağlı təkliflər verilib:
“Aylardır təklif vermişik, amma hökumət müzakirəyə belə çıxarmaq istəmir, çünki deməyə sözü, əks-arqumenti yoxdur - pərakəndə satışda ərzaq məhsullarının ƏDV-si kəskin azaldılmalıdır, 18%-dən 2%-ə endirilməlidir, bu qiymətlərin tənzimlənməsində ciddi rol oynayacaq.
İnflyasiya, qiymət artımı insanların belini bükür, kasıblaşdırır, real gəlirlər azalır, hökumət isə bu dərinləşən problemi görməzdən gəlməklə məşğuldur. Ölkədə 30 ildə normal iqtisadi institutlar, sistem də qura bilməyiblər ki, inflyasiya ilə, məsələn, Mərkəzi Bankın uçot dərəcəsi kimi alətlərlə mübarizə aparmaq mümkün olsun - bizdə MB-nin uçot dərəcəsi formal, mənasız bir alətdir, çünki MB-nin özü formal, hökumətdən asılı qurumdur, halbuki, MB dövlət qurumu olmalı, müstəqil siyasət yeritməlidir. Amma bu Mərkəzi Bankın da günahı deyil, ümumi sistem zay olandan sonra MB nə edə bilər ki?!”.
