Dəhşətli qəzada ölənlər şəhidin qardaşı ilə jurnalistin oğlu imiş
Yevlax Rayon İcra Hakimiyyətindən “Qafqazinfo”ya bildirilib ki, Vətən Müharibəsi şəhidi Elçin Mirzəyevin qardaşı Həsən Mirzəyevin idarə etdiyi avtomobilin qəzaya uğraması səbəbindən xəsarət alan sürücünün övladları paytaxta göndərilib.
Bildirilib ki, qəzada şəhidin 41 yaşlı qardaşı və onun sərnişini olan 44 yaşlı Rüfət Həmidov hadisə yerində vəfat edib. Rüfət Həmidov Yevlaxda fəaliyyət göstərən “Kür” qəzetinin jurnalisti Ramiz Həmidovun oğludur.
Dəhşətli yol qəzası Yevlax şəhəri Ceyhun Mustafayev küçəsində baş verib. H.Mirzəyevin idarə etdiyi “VAZ 2107” markalı avtomobil Şəhidlər Xiyabanının hasarına çırpılıb. Faktla bağlı araşdırmalar davam etdirilir.
Qeyd edək ki, Vətən Müharibəsinin ilk günündən də döyüşlərdə iştirak edən Elçin Mirzəyev 2020-ci ilin oktyabrın 10-da Tərtər-Ağdərə-Suqovuşan istiqamətində gedən döyüşlərdə qəhrəmancasına həlak olub. Nəşi 3 gün sonra Yevlax şəhər Şəhidlər Xiyabanında torpağa tapşırılıb. Ölümündən sonra Elçin 3 medalla “Vətən uğrunda”, “Suqovuşanın azad olunmasına görə” və “Laçının azad olunmasına görə” medalları ilə təltif olunub.
